MANILA, Philippines — Bukod sa Cignal HD ay makakaharap din ni Creamline outside hitter Bernadeth Pons ang dati niyang college coach na si Shaq delos Santos sa kanilang knockout semifinal game sa 2024 Premier Volleyball League (PVL) Reinforced Conference.
Naging player ni Delos Santos si Pons sa Far Eastern University Lady Tamaraws sa UAAP.
At ngayon ay hinahawakan ni Delos Santos ang HD Spikers habang kumakamada naman si Pons para sa Cool Smashers.
“Siyempre, excited ako na makalaban din sila. Alam ko na kilala ako ni coach (Delos Santos) kung paano ako maglaro, pero siyempre mas marami na akong baon ngayon,” wika ng tubong Talisay, Negros Occidental.
Magtutuos ang Creamline at Cignal sa knockout semis bukas para sa isa sa dalawang championship ticket.
Ang 27-anyos na si Pons ang sumalo sa naiwang trabaho nina injured Alyssa Valdez at Tots Carlos habang hindi rin naglalaro si Jema Galanza na kasama ng Alas Pilipinas.
Sa kabila ng magkaiba nilang koponan ay patuloy pa rin ang magandang samahan nina Pons at Delos Santos.
“Si coach Shaq naman hindi naman napuputol ‘yung communication namin, minsan naman nag-uusap pa rin kami,” wika ng 5-foot-8 na si Pons sa kanyang dating FEU coach.