Pag-remit ng PAGCOR at PCSO sa PSC dapat bantayan--Guiao

MANILA, Philippines — Matapos ang desisyon ng Supreme Court noong nakaraang linggo, ang aktuwal na pagre-remit ng Philippine Amusement and Gaming Corporation (PAGCOR) at Philippine Charity Sweepstakes Office (PCSO) ng pondo sa Philippine Sports Commission (PSC) ang kailangan namang bantayan.

Ito ang sinabi kahapon ni dating Pampanga Congressman at ngayon ay PBA coach Yeng Guiao sa Philippine Sportswriters Association (PSA) Forum kasama si Atty. Avelino ‘Jun’ Guzman Jr.

“Legally and morally we’re standing on solid grounds. Iyong bulk of the work nandiyan na eh,” wika ni Guiao sa sesyon na idinaos sa PSC conference room ng Rizal Memorial Sports Complex at inihandog ng San Miguel Corporation, PSC, Philippine Olympic Committee, MILO, Smart/PLDT at 24/7 sports app ArenaPlus.

Kinatigan ng Supreme Court ang petisyon ni Guiao noong 2016 kung saan siya ang vice chairman ng House Committee on Youth and Sports na nag-uutos sa PAGCOR na ibigay sa PSC ang limang porsiyento ng kanilang gross income simula noong 1993 hanggang ngayong 2024 base sa nakasaad sa Republic Act No. 6847 na bumuo sa PSC noong 1990.

Dapat namang i-remit ng PCSO sa sports agency ang 30 porsiyento ng kanilang charity fund at ang kinita sa anim na sweepstakes ng lottery draw kasama ang buwis sa horse races sa special holidays mula noong 2006 hanggang ngayong taon.

Kung susumahin ay maaaring umabot sa P25 bilyon ang pondong makukuha ng PSC mula sa PAGCOR at PCSO.

Sa ilalim ng batas, hindi na puwedeng umapela ang PAGCOR at PCSO sa nasabing Supreme Court decision, ngunit mayroong 15 araw para magsampa ng motion for reconsideration.