MANILA, Philippines — Inutusan kahapon ng Supreme Court ang Philippine Amusement and Gaming Corporation (PAGCOR) at Philippine Charity Sweepstakes Office (PCSO) na magbigay ng bahagi ng kanilang kinikita sa Philippine Sports Commission (PSC).
Ito ang desisyon ng Supreme Court mula sa petition for mandamus na isinampa ni dating Pampanga Congressman at Rain or Shine coach Yeng Guiao noong 2016.
Sa nasabing petisyon ay inuutusan ang PAGCOR, PCSO at ang Office of the President na mag-remit ng pondo sa PSC base sa mandato ng Republic Act 6847 o ang “The Philippine Sports Commission Act.”
“The Philippine Amusement and Gaming Corporation is ordered to account and remit the full amount of 5% of its gross income per annum, after deduction of its 5% franchise tax, from 1993 to present in favor of the Philippine Sports Commission,” ayon sa desisyong isinulat ni Senior Associate Justice Marvic Leonen.
“Respondent Philippine Charity Sweepstakes Office is ordered to account and remit to the Philippine Sports Commission the 30% representing the charity fund of the proceeds of six sweepstakes or lottery draw per annum, including its lotto draws, for the years 2006 to present.”
Ayon kay Guiao, hindi sinunod ng PAGCOR at PCSO ang nakasaad sa Section 26 kung saan dapat silang magbigay ng bahagi ng kanilang gross income sa PSC.
Ang pondo ay mapupunta sa pagsasanay at partisipasyon ng mga national athletes sa mga international competitions kagaya ng Asian Games, Southeast Asian Games at Olympic Games.
Nagmula ang Pilipinas sa best finish sa Olympics matapos ang hinakot ni gymnast Carlos Yulo na dalawang gold medals sa 2024 Paris Games.
Bukod pa ito sa tig-isang bronze nina boxers Nesthy Petecio at Aira Villegas.