MANILA, Philippines — Kumolekta si Robert Bolick ng 24 points, 11 assists at 9 rebounds sa 104-87 paggupo ng NLEX sa Blackwater sa PBA Season 49 Governors’ Cup kahapon sa Smart Araneta Coliseum.
Halos makumpleto ni Bolick ang unang triple-double sa torneo kundi lamang hinablot ni import Myke Henry ang pang-10 rebound sana ni Bolick.
“Wala naman masaya lang na nanalo. Iyong fourth quarter lang. Ayan na naman kami iyong nagle-letdown lagi. Dapat baguhin na namin iyon,” ani Bolick.
Ang tinutukoy ni Bolick ay ang pagtatayo ng Road Warriors ng 26-point lead sa third quarter na naputol ng Bossing sa 83-94 sa huling 2:19 minuto ng fourth period.
“Kapag ganoon dapat kill mode na kaagad. Hindi kami mag-relax tapos papabalikin lang (iyong kalaban). Sayang iyong pinaghirapan namin,” sabi ng star guard.
Ang three-point shot ni rookie Richie Rodger sa huling 1:35 minuto ang muling naglayo sa NLEX sa 97-83 patungo sa paghuhulog sa Blackwater sa 0-2 record.
Umiskor si Henry ng 31 points para sa Road Warriors at may 12 markers si Robbie Herndon.
Umiskor si Christian David at Troy Rosario ng tig-17 points sa panig ng Bossing kasunod ang 16 markers ni No. 2 overall pick Sedrick Barefield.
Samantala, muling kinuha ng NorthPort (0-1) si Australian import Venky Jois para palitan si Taylor Johns para sa kanilang pagsagupa sa Terrafirma (0-1) ngayong alas-5 ng hapon sa Big Dome.
Sa ikalawang laro sa alas-7:30 ng gabi ay magkikita ang Converge (1-0) at Magnolia (0-1).
Umiskor ang FiberXers ng 127-95 panalo sa Dyip, samantalang nakalasap ang Hotshots ng 94-99 talo sa Meralco Bolts sa kanilang mga unang laro.