5 golds nilangoy ni Isleta sa PAI National Trials
![5 golds nilangoy ni Isleta sa PAI National Trials](https://media.philstar.com/photos/2024/08/22/chloe-isleta-swimming_2024-08-22_17-19-55.jpg)
MANILA, Philippines – Kumolekta si Vietnam Southeast Asian Games gold medalist Chloe Isleta ng limang gintong medalya sa Philippine Aquatics Inc. (PAI) National Trials 25-meter short course kahapon sa Teofilo Yldefonso Swimming Pool sa Malate, Maynila.
Nagreyna si Isleta sa girls' 50-meter backstroke sa bilis na 27.83 segundo at sa 200m freestyle sa tiyempong 2:04.17 sa event na sinusuportahan ng Speedo, Pocari Sweat, at Philippine Sports Commission (PSC).
Nauna nang nagwagi si Isleta sa 100m Individual Medley (1:01.64), 100m backstroke (1:00.31) at 50m freestyle (25.65).
"Ginagawa ko lang ang lahat ng makakaya ko. I guess I’m in good shape and ready to compete for the flag and country,” ani Isleta.
Ang National Trials ay ginagamit bilang batayan sa pagpili ng mga miyembro ng Philippine Team na lalahok sa World Aquatics World Series (short course) na binubuo ng kompetisyon sa Oktubre 18-20 (Series 1) sa Shanghai, China; Series 2 sa Oktubre 24-26 sa Incheon, South Korea; at Series 3 sa Oktubre 31 hanggang Nobyembre 2 sa Singapore.
Ang serye ay nagtatapos sa Championships sa Disyembre 10-15 sa Budapest, Hungary.
Ang iba pang gold medalists ay sina Miguel Barreto ng Ayala Harpoons sa boys 200-m free (1:49.68); Rian Marco Tirol sa boys 100m breast (1:00.91); Sophia Annika Margare Isip sa girls 100m breast (1:12.41), Jerard Dominic Jacinto 50m back (24.89); Robin Christophel Domingo sa 200m butterfly (2:02.38) Micaela Jasmine Mojdeh 200m fly ( 2:15.31); Raymund Paloma 800mfree (8:23.94); Jie Angela Talosig girls 800m free (9:30.09).
- Latest