Dyip wasak sa Fiberxers
MANILA, Philippines — Sa isang iglap ay nakalayo ang Converge sa third period mula sa isang four-point lead sa halftime para gibain ang Terrafirma, 127-95, sa PBA Season 49 Governors’ Cup kahapon sa Smart Araneta Coliseum.
Bumanat ang FiberXers ng 47 points sa nasabing yugto para idiskaril ang debut sa Dyip nina dating Ginebra Gin Kings mainstays Christian Standhardinger at Stanley Pringle.
“It’s a team effort and we give credit to the other team. They’re a good team, especially with the addition of Stan (Standhardinger) and Pringle,” ani coach Franco Atienza na pumalit kay Aldin Ayo.
Humakot si import Scotty Hopson ng 46 points, 8 rebounds at 3 assists para banderahan ang Converge habang may 21 markers si Alec Stockton.
Tumapos si Pringle na may 19 points sa panig ng Terrafirma at may 18 at 17 markers sina import Antonio Hester at Standhardinger, ayon sa pagkakasunod.
Mula sa 53-49 halftime lead ay humataw ang FiberXers ng 16-3 atake sa likod nina Hopson at Stockton para ilista ang 79-52 bentahe sa third quarter.
Lalo pang nabaon ang Dyip sa 67-100 sa huling 33 segundo nito matapos ang layup ni Schonny Winston.
Ang ikatlong four-point shot ni Hopson ang nagposte sa 123-92 kalamangan ng Converge sa huling 4:01 minuto ng fourth period na tuluyan nang nagpasuko sa Terrafirma.
Samantala, pag-aagawan ng TNT Tropang Giga at Meralco ang solong liderato sa Group A sa kanilang banggaan ngayong alas-7:30 ng gabi sa Big Dome.
Umiskor ang Tropang Giga ng 101-95 paggupo sa NorthPort Batang Pier noong Martes.
Kinuryente naman ng Bolts ang Magnolia Hotshots, 99-94.
Hangad ng Blackwater na makabangon sa naunang kabiguan sa pagharap sa NLEX sa unang laro sa alas-5 ng hapon.
- Latest
