Japanese citizen na si Jaja
![Japanese citizen na si Jaja](https://media.philstar.com/photos/2024/08/17/5_2024-08-17_22-14-12.jpg)
MANILA, Philippines — Nakumpleto na ni middle blocker Jaja Santiago ang naturalization process nito upang makumpleto ang kanyang Japanese citizenship.
Inihayag ng 6-foot-5 Pinay spikers ang magandang balita sa kanyang social media kahapon kung saan maaari na itong makapaglaro bilang bahagi ng national team ng Japan.
Minowa Sachi ang magiging Japanese name ni Santiago.
Aminado si Santiago na hindi naging madali ang kanyang naging desisyon. Alam nitong may susuporta at tataliwas sa kanyang ginawa.
“Changing nationality was never an easy decision. It took a lot of sacrifices to achieve your dreams. Some people will support my decisions, others will not understand my decisions,” ani Santiago.
Sa kabila ng pagpapalit ng citizenship, nilinaw ni Santiago na mananatili itong purong Pinay sa puso, sa dugo at hindi nito malilimutan ang kanyang bayang sinilangan.
“Now that I have already obtained my Japanese citizenship, in my heart, blood, mind, and soul, I am always a Filipina who was born in the Philippines. And I will not forget that,” ani Santiago.
Nagpasalamat si Santiago sa Japan Volleyball Association sa tiwalang ibinigay sa kanya gayundin sa pamunuan ng Philippine National Volleyball Federation sa suporta nito sa kanyang desisyon.
Kasalukuyang bahagi si Santiago ng JT Marvelous sa Japan V-League.
Asawa ni Santiago si Japanese mentor Taka Minowa na head coach ng Akari sa Premier Volleyball League (PVL).
- Latest