Mojdeh, Ajido nanapaw sa National Trials

MANILA, Philippines — Sinapawan ng mga homegrown swimmers ang mga Filipino-foreign tankers sa Day Two ng Philippine Aqua­tics, Inc. (PAI) National Trials (50-meter) Championships kahapon sa Teofilo Yldefonso Swimming Pool sa Rizal Memorial Sports Complex sa Vito Cruz, Manila.

Pinalakas nina national junior record-holders at multi-titlist Micaela Jasmine Mojdeh at Jamesrey Ajido ang rat­sada ng mga lokal na humakot ng gintong medalya sa kani-kanilang mga dibisyon para tabunan ang mga Fil-foreign swimmers na nakabase sa ibang bansa sa pa­ngunguna ni Paris Olympics bet Jarold Hatch.

Wagi si Mojdeh, semifinalist sa 2023 World Junior Championships sa Israel, sa girls’ 16-18 200m breaststroke sa bilis na 2:40.42 para sirain ang Southeast Asian Age Group Qualifying Time Standard (QTS) na 2:40.42.

“Got a lot of catching up in my training. Medyo feeling ko hindi gaanong ready iyong katawan ko sa training, but I’m good it’s a good swim and happy for the results,” wika ni Mojdeh.

Binura rin ni Ajido, gold medalist sa Asian Age Group Championships noong Pebrero sa New Clark City, ang QTS sa boys’ 14-15 100-meter butterfly (57.47 segundo) nang magwagi sa oras na 56.25 segundo.

Napantayan niya ang QTS na 24.64 segundo sa 50m freestyle para sa kabuuang apat na gintong medalya sa event na ginamit bilang seleksyon para sa mga miyembro ng national pool at suportado ng Speedo, Pocari Sweat, at Philippine Sports Commission (PSC).

Ang beteranong SEA Age Championships medalist ay nanalo sa boys’ 14-15 100m backstroke (1:01.01) at 200m Individual Medley (2:12.57) sa Day One.

Si Fil-Am Riannah Chantelle Coleman ay nanalo sa girls’ 14-15 200m breast sa oras na 2:43.55.