MANILA, Philippines — Pupuntiryahin ng PLDT ang ikaanim na panalo, habang magtutuos sa mahalagang laro ang mag-utol na Creamline at Choco Mucho sa Pool C sa second round ng 2025 Premier Volleyball League Reinforced Conference sa Mall of Asia Arena sa Pasay City.
Haharapin ng High Speed Hitters ang nagdedepensang Petro Gazz Angels ngayong alas-3 ng hapon kasunod ang salpukan ng Cool Smashers at Flying Titans sa alas-5.
Sa unang laro sa ala-1 ng hapon ay magtutuos ang Chery Tiggo Crossovers at sibak nang ZUS Cofee Thunderbelles.
Nangunguna ang PLDT sa kanilang grupo tangan ang 5-1 baraha sa itaas ng Creamline (4-2), Chery Tiggo (4-2), Petro Gazz (4-3), Choco Mucho (2-4) at ZUS Coffee (0-6).
Ang High Speed Hitters pa lamang ang nakakapasok sa knockout quarterfinals.
Nagmula ang PLDT sa 25-18, 25-14, 25-12 pagwalis sa ZUS Coffee.