MANILA, Philippines — May nakita si Rain or Shine coach Yeng Guiao kay Fil-Swedish guard Felix Lemetti na hindi nahanap ng 11 pang koponan sa nakaraang Season 49 PBA Rookie Draft.
Ayon sa seven-time PBA champion mentor, isang tunay na point guard ang 6-foot-1 na si Lemetti na maaari niyang isama kina Andrei Caracut, Anton Asistio at Adrian Nocum sa kanilang backcourt.
“He’s a true point guard, solid point guard. He can score. At the same time, he can command ‘yung team niya. We’re looking for somebody like that,” ani Guiao sa kanilang No. 8 overall pick matapos si No. 7 Fil-Am forward Caelan Tiongson.
Si Lemetti, ipinanganak at lumaki sa Sweden, ay naglaro sa NCAA Division 1 team Omaha Mavericks kung saan siya nagtala ng mga averages na 7.1 points, 2.2 rebounds at 1.9 assists.
Isinuot din ni Lemetti ang mga uniporme ng Fairfield University, Salt Lake Community College at Southern Utah University.
Naging miyembro rin siya ng Sweden national team.
“Getting that international experience and playing against those opponents, I feel like that’s going to help me in this league as well, playing against bigger and faster opponents,” ani Lemetti.
Inaasahang gagamitin ng Elasto Painters si Lemetti sa kanilang kampanya sa Season 49 PBA Governors’ Cup sa Agosto 18.