MANILA, Philippines — Aminado si Barangay Ginebra coach Tim Cone na hindi sila makakakuha ng magaling na big man kagaya nina 6-foot-8 Justine Baltazar at 6’7 Kai Ballungay sa Season 49 PBA Rookie Draft bukas.
Kaya kung sino na lamang ang hindi mapipili at sakto sa kanilang pick ang kukunin ni Cone sa event na idaraos sa Glorietta sa Makati City.
“We know we’re not getting any of them,” wika ng two-time PBA Grand Slam champion coach kina Baltazar at Ballungay. “We have to have the discipline to not to look at them and look at the other guys.”
Hawak ng Gin Kings ang No. 10 overall pick kasunod ang Meralco Bolts (No. 11) at San Miguel Beermen (No. 12).
Ang Converge FiberXers ang hihirang sa No. 1 overall pick kasunod ang Blackwater Bossing (No. 2), Terrafirma Dyip (No. 3), Phoenix Fuel Masters (No. 4), NorthPort Batang Pier (No. 5), NLEX Road Warriors (No. 6), Rain or Shine Elasto Painters (No. 7 at 8) at Magnolia Hotshots (No. 9).
Si Baltazar ang inaasahang kukunin ng Converge kasunod si Ballungay na huhugutin ng Blackwater.
Pag-aagawan din sa first round sina Fil-Am Sedrick Barefield, RJ Abarrientos, CJ Cansino, Evan Nelle, Mark Nonoy, Caelan Tiongson, Jerom Lastimosa, Dave Ildefonso, Jonnel Policarpio at Ben Philips.
Inaasahang magkakaroon ng mga trades sa gabi ng PBA Draft na tradisyunal na nangyayari sa hanay ng 12 koponan.
“I think there’s gonna be a lot of play and a lot of teams are gonna be happy about their picks,” sabi ng 25-time PBA champion mentor na si Cone.