Delgaco handa na sa Paris Games

MANILA, Philippines —  Ipinakita ni Filipina Olympian rower Joanie Delgaco ang kanyang kahandaan para sa 2024 Paris Olympic Games matapos tanghaling fastest female participant sa 7th Waistrooss Head of River event sa Schwebsange, Luxembourg.

Sinabi ni coach Edgardo Maerina na impresibo ang ipinakita ni Delgaco sa nasabing 5000m handicap race.

Ang Pinay rower ay inimbitahan ng local training club na Régates Messines para lumahok sa Luxembourg event.

Hangad ng 26-anyos na Philippine Navy personnel na makasagwan ng medalya sa Paris Olympics na nakatakda sa Hulyo 26 hanggang Agosto 11.

Kasama ang pito pang Olympic-bound athletes, kaagad sumalang si Delgaco, ang unang Pinay rower na sasabak sa quadrennial event, sa training camp sa Metz.

Sa women’s single sculls ay tumapos si Delgaco sa ikaapat na puwesto sa bilis na 7:49.39 sa 2,000-meter event ng 2024 World Rowing Asian at sa Oceanian Olympic Qualification Regatta sa Chungju, South Korea.

Sapat na ito para makapasok siya sa top five at makuha ang tiket sa 2024 Paris Olympics.

Ang tubong Iriga City, Camarines Sur ang ikalawang rower ng Pilipinas na sasabak sa ikalawang sunod na Olympics matapos si Cris Nievarez sa 2020 Tokyo Games.