MANILA, Philippines — Isang Japanese open spiker ang hinugot ng Zus Coffee bilang import para sa 2024 Premier Volleyball League (PVL) Reinforced Conference.
Isa si Asaka Tamaru sa mga naging susi sa pagrereyna ng Kurashiki team sa 2023 PVL Invitational Conference kung saan siya kinilalang First Best Open Spiker.
“When I complimented her that she was strong, she said that she was still at 50-percent,” ani Thunderbelles’ coach Jerry Yee kay Tamaru. “Okay kami with her and the new girls, along with the new chance to be here.”
Nakasama na ni Yee ang 25-anyos na Japanese sa kanyang coaching staff sa Farm Fresh sa PVL at sa University of the East Lady Warriors sa UAAP nitong taon.
Makakatuwang ni Tamaru sa Zus Coffee sina reigning NCAA MVP Cloanne Mondoñedo, Gayle Pascual, Jade Gentapa at Mich Gamit ng St. Benilde Lady Blazers.
Samantala, kinuha ng Cignal HD si Venezuelan import MJ Perez.
Unang naglaro ang 36-anyos na Olympian para sa F2 Logistics Cargo Movers sa Philippine Super Liga noong 2017 hanggang 2019.
Iginiya ni Perez ang Cargo Movers sa PSL title sa 2017 Grand Prix kung saan siya hinirang na Most Valuable Player bago naglaro sa mga professional leagues sa Italy, Egypt, Cyprus at Vietnam.
Nagmula ang veteran wing spiker sa paglalaro para sa Alexandria Sporting Club VC sa Egypt.
Bukod sa Cignal, may mga reinforcement na rin ang Creamline (Erica Staunton), Choco Mucho (Zoi Faki), Chery Tiggo (Khat Bell), PLDT Home Fibr (Elena Samoilenko) at Capital1 Solar Energy (Marina Tushova).