MANILA, Philippines — Unti-unti nang nakukumpleto ang 12 koponang magpaparada ng imports sa 2024 Premier Volleyball League (PVL) Reinforced Conference.
Kinuha ng Choco Mucho si Greek reinforcement Zoi Faki sa hangaring makopo ang pinapangarap na kauna-unahang PVL crown.
“Wing spikers are locked and loaded with power! Say hi to Zoi Faki who has the experience and strength to deliver the much-needed boost for the team,” pahayag ng Flying Titans sa kanilang social media post kahapon.
Naglaro ang 6-foot-1 outside hitter sa US NCAA para sa University of Pittsburgh at San Diego State University bago bumalik sa Greece at kumampanya sa AO Thiras at Apollon Kalamatas club teams.
Makakatuwang ng 25-anyos na si Faki ang bagong hugot na si Dindin Santiago-Manabat para sa Choco Mucho na natalo sa Creamline sa nakaraang PVL All-Filipino Conference Finals.
Hindi naman makakalaro sa Flying Titans sina Alas Pilipinas members Sisi Rondina at Cherry Nunag at sina injured Des Cheng (knee), Aduke Ogunsanya (knee) at Kat Tolentino (ear).
Bukod kay Faki, ang iba pang imports na hahataw sa PVL Reinforced Conference ay sina Erica Staunton ng Creamline, Khat Bell ng Chery Tiggo, Elena Samoilenko ng PLDT at Marina Tushova ng Capital1 Solar Energy.