MANILA, Philippines — Kumpiyansa si Go For Gold founder Jeremy Go na panonoorin ng mga sports fans ang Series 2 ng Go For Gold Criterium Race sa Linggo sa City Di Mare sa Cebu.
Higit sa 400 kalahok ang sasabak sa 10 categories ng one-day race na may kabuuang P200,000 prize money kung saan ang mananalo sa premier men’s at women’s elite categories ay tatanggap ng tig-P20,000.
“With Cebu being a hotbed of cycling and cycling talent, we expect na maraming manonood ng event natin,” wika kahapon ni Go sa Philippine Sportswriters Association (PSA) Forum sa conference hall ng Rizal Memorial Sports Complex.
Nakasama ni Go si lady commissaire Sunshine Vallejos sa sesyon na inihandog ng San Miguel Corporation, Philippine Sports Commission, Philippine Olympic Committee, Smart/PLDT, MILO at ng leading sports entertainment gateway na ArenaPlus.
Ang iba pang kategorya sa flat 1.1 km course ay ang Women’s at Men’s Youth (15-16 years old), Women’s at Men’s Junior (17-18 years old), Age Group Men (30-39 years old), Age Group Men (40-up), Men Under-23 at Managers.
Ang men’s elite ay ipapadyak sa 25 laps habang ang women’s elite ay 20 laps.