Pacquiao-Suzuki bout kasado sa July 28
MANILA, Philippines — Kasado na ang pagbabalik-aksiyon ni eight-division world champion Manny Pacquiao.
Makakaharap ng Pinoy champion si Japanese mixed martial artist Chihiro Suzuki sa isang exhibition match sa Hulyo 28 sa Saitama Super Arena sa Saitama, Japan.
Tatlong rounds lang tatagal ang laban kung saan may tatlong minuto kada round.
Kasabay nito, itinanggi ni Pacquiao ang kasado na napapabalitang magbabalik ito sa boxing scene laban umano kay American fighter Mario Barrios para sa WBC welterweight world title fight.
Nasa negosasyon pa lamang ang kampo ni pacquiao at Barrios kaya’t malabo pa ito.
“We’re still in negotiations and we’re talking about that. The fight has not materialized yet,” ani Pacquiao.
Kung matutuloy ito, posible itong maganap sa Nobyembre o Disyembre.
Sa ngayon, nais muna ni Pacquiao na ituon ang kaniyang atensiyon sa nalalapit na laban nito kay Suzuki.
Target ni Pacquiao na maitala ang knockout win laban sa Japanese fighter.
“It’s not an exhibition, this is a fight. We are looking for a knock-out for this fight,” ani Pacquiao.
Ituturing ito ni Pacquiao na tulad ng mga laban nito sa professional boxing kaya’t inaasahang magiging pukpukan ang training nito bago ang laban.
Sasabak sana si Pacquiao laban kay Muay Thai fighter Buakaw Banchamek ng Thailand noong Abril sa isang exhibition match sa Bangkok, Thailand.
Subalit nakansela ito.
- Latest
