MANILA, Philippines — Uuwi ang Philippine swimming team tangan ang tatlong tatlong medalya galing sa 13th Asean Schools Games sa Da Nang, Vietnam.
Nanguna sa kampanya ng Team Philippines si Brent International School-Manila standout Micaela Jasmine Mojdeh na kumana ng dalawang tanso.
Unang umariba si Mojdeh sa girls’ 100m butterfly kung saan nagsumite ito ng isang minuto at 4.0 segundo sapat para masiguro ang podium finish.
Sa huling araw ng bakbakan ay nagdagdag si Mojdeh ng isang tanso galing naman sa girls’ 200m butterfly matapos magrehistro ng dalawang minuto at 20.11 segundo.
Naduplika ni Mojdeh ang dalawang tansong medalyang nakuha nito noong 2019 Asean Schools Games sa Semarang, Indonesia.
“It was a great experience competing in the Asean Schools Games. I would like to thank everyone who supported not only me but our whole team — our parents, coaches, officials and to all who prayed for us,” ani Mojdeh na semifinalist sa World Juniors Championships sa Lima, Peru noong 2021.
Galing naman ang isa pang tansong medalya kay Albert Jose Amaro II ng San Beda University.
Naorasan si Amaro ng 25.45 segundo para angkinin ang ikatlong puwesto sa boys’ 50m butterfly.
Kasama ni Mojdeh sa girls’ division sina Kyla Bulaga, Shania Baraquiel, Krystal David, Catherine Cruz, Riannah Coleman, Clara Delos Santos, Trixie Ortiguerra, Daryn Santamaria, Patricia Santor, Renavive Subida, Maxene Uy, Ishaelle Villa at Ashley Wong.
Nagpartisipa rin sa boys’ class sina Aishel Cid Evangelista Julian De Kam, Anton Della, Ashton Jose, Paolo Labanon, Jaime Maniago, Juaquin Medenilla, Nimrod Montera, Shiblon Montera, Kobie Rivera, Kaden Sy, Juaquin Taguinod at Jan Mikos Trinidad.