MIAMI — Kumolekta si Tyler Herro ng 24 points, 10 rebounds at 9 assists sa 112-91 pagpapatalsik ng Heat sa Chicago Bulls para angkinin ang No. 8 berth sa Eastern Conference first-round playoffs.
Nag-ambag si rookie Jaime Jaquez Jr. ng 21 points sa pagharap ng Miami sa No. 1 Boston Celtics sa opening round.
Tumipa si Kevin Love ng 16 markers at may 13 points si Bam Adebayo.
Mula sa 11-6 deficit sa Bulls ay bumangon ang Heat para agawin ang 25-11 bentahe patungo sa pagtatayo ng 20-point lead sa second quarter.
Mula rito ay hindi na nilingon ng Miami ang Chicago patungo sa panalo.
Sa New Orleans, bumanat si Brandon Ingram ng 24 points at humakot si Jonas Valanciunas ng 19 points at 12 rebounds sa 105-98 pagsibak ng Pelicans sa Sacramento Kings sa huling play-in tournament game.
Inangkin ng New Orleans, naglaro na wala si injured leading-scorer Zion Williamson, ang No. 8 spot sa Western Conference first-round playoffs katapat ang No. 1 seed Oklahoma City Thunder.
Nauna nang natalo ang Pelicans kay LeBron James at sa Los Angeles Lakers, 106-110, sa labanan sa No. 7 spot.