MANILA, Philippines — Solo sa top spot ng team standings ang National University Lady Bulldogs matapos lapain ang Adamson University Lady Falcons, 25-16, 25-14, 25-18 sa UAAP Season 86 women’s volleyball tournament na nilaro sa Philsports Arena sa Pasig kahapon.
Nakasiguro ang Lady Bulldogs ng playoff para sa twice-to-beat incentives na ibibigay sa top two teams pagkatapos ng 14-game double round robin.
May kartang 11-2 ang NU, kailangan na lang nila na maipanalo ang kanilang huling laro upang makasiguro sa inaasam na bonus.
“Nung first round nagkulang kami sa enjoyment. Ngayon nandoon na yung enjoyment saka yung maturity na kailangan hindi kami magrerelax na every game namin dapat all out pa rin kami kahit sino kalaban,” ani Alyssa Solomon na nagtala ng 14 points mula sa 12 attacks at tig-isang block at service ace.
Kalaban ng Lady Bulldogs sa kanilang huling laro ang fourth-placed na Far Eastern University Lady Tamaraws sa Miyerkules.
Tumulong din sa opensa para sa NU sina Kaye Bombita, Bella Belen at Myrtle Escanlar
Sa unang laro, lumalakas ang tsansa ng Lady Tamaraws na makasampa sa top two ng team standings matapos suwagin ang 25-20, 27-29, 25-21, 25-21 panalo laban sa University of the Philippines Lady Maroons.