Boljoon mipayaka sa determinadong Sibonga sa Cabaron Cup

CEBU, Philippines — Ang Boljoon mibuntog sa kulang kaayo og tawo apan determinadong Sibonga, 90-75, CEBU, Philippines — pagbalik sa aksiyon sa Mayor Inocentes Cabaron Invitational Inter-Town Basketball Tournament niadtong weekend didto sa Moalboal covered court.

Ang Boljoon 2-1 na karon sa Group B sunod sa Dalaguete (3-0) ug Samboan (2-0). Gikuptan sa Dalaguete ang solong liderato sa ilang grupo human miposte og duha ka sagunson nga daog batok sa Sibonga, 95-86, ug Barili, 72-65.

Batok sa Sibonga nga miduwa uban ang pito lamang ka players, ang Boljoonanons misutoy ngadto sa 24-12 nga bentaha human sa nag-unang 10 minutos sa aksiyon.

Apan ang Sibonga nagsandig sa mainit nga mga kamot ni Ehman Janson Suarez sa ikaduhang kuwarter diin ilang gilabhan ang Boljoon, 34-20, aron ilogon ang labaw, 46-44, sa halftime.

Si Suarez, nga mitagak og 25 puntos sa pilderong kawsa batok sa Dalaguete niadtong Abril 6, hait kaayo ang tinirahan sa bisan asang anggulo sa ikaduhang kuwarter diin siya mirapido og 19 puntos apil na ang duha ka hagpok kaayong 3-pointers.

Nakabawi ra hinoon ang Boljoon sa ikatulong kuwarter pinaagi sa pagsalida nilang Kenjie Gumera ug Epoy Caneda aron pag-abante nila balik og double-digit, 69-59.

Si Caneda maoy nangu sa Boljoon uban ang 26 puntos samtang si Gumera mitali og nuybe sa iyang 15 puntos sa katapusang kuwarter. Si Suarez mipabuto og 31 puntos samtang si Ledesma midugang og 13 puntos apan nakawang ang ilang paningkamot sa kampo sa Sibonga.

Sa Group A, ang Dumanjug milansang sa ikatulo nilang sunod-sunod nga daog bisa'g wala makapatulo og singot kay wala mobutho ang Malabuyoc sa ilang duwa niadtong Abril 6. Ang Aloguinsan anaa sa ikaduhang puwesto bitbit ang 2-1 rekord samtang ang Badian ug Ronda parehong nagtangag og 1-2 nga baraha.