Dyip ibinangga ng Tropang Giga

MANILA, Philippines — Kasabay ng pagresbak mula sa pagkatalo ay diniskaril ng TNT Tropang Giga ang hangad na pagsosyo ng Terrafirma sa liderato.

Bumira si Jayson Castro ng 23 points tampok ang limang three-point shots para sa 100-97 paglusot ng Tropang Giga sa Dyip sa Season 48 PBA Philippine Cup kahapon sa Smart Araneta Coliseum.

Umiskor sina Calvin Oftana at Glenn Khobuntin ng tig-19 markers para sa 2-1 kartada ng TNT.

Kumolekta si top overall pick Stephen Holt ng 24 points, 8 boards at 7 assists para sa 2-1 baraha ng Terrafirma.

“They’re all showing up now and that’s making them a lot more competitive,” ani Tropang Giga coach Chot Reyes sa Dyip at Blackwater Bossing na naunang tumalo sa kanila.

“In our discussion before the game, we know that these teams are going to make it very difficult for us,” dagdag ng dating Gilas Pilipinas mentor.

Isinara ng TNT ang third period bitbit ang 73-69 patungo sa pagtatala ng 92-84 abante sa 5:08 minuto ng fourth quarter.

Nagtuwang sina Holt, Tiongson at Aldrech Ramos para idikit ang Terrafirma sa 97-98 sa huling 1:06 minuto ng laro.

Sa huling posesyon ng Dyip ay nagmintis si Ramos sa kanyang tangka sa 3-point line at si Tiongson sa jumper nito kasunod ang dalawang free throws ni Castro para sa 100-97 kalamangan ng Tropang Giga sa nalalabing 0.6 segundo.