MANILA, Philippines — Ipinoste ng University of Perpetual Help ang pang-limang sunod na panalo matapos talunin ang Arellano University, 100-79, sa NCAA Season 99 junior basketball tournament kahapon sa Filoil EcoOil Arena sa San Juan City.
Sinolo ng Junior Altas ang liderato sa kanilang 5-0 record at ibinagsak ang Braves sa 1-4 marka.
Tumipa si Amiel Amido ng 21 points, 7 rebounds, 7 assists at 1 steal para banderahan ang Perpetual, habang naglista si Lebron Daep ng 11 markers, 10 boards, 2 assists, 2 steals at 3 blocks.
Samantala, pinatumba ng nagdedepensang Letran Squires ang Mapua Red Robins, 86-69, para sa ikatlong dikit na ratsada.
May magkatulad na 4-1 baraha ngayon ang Squires at Red Robins.
Inagaw naman ng San Beda Red Cubs ang 64-62 panalo kontra sa St. Benilde Junior Blazers para sa 3-2 kartada.
Laglag ang Juniors Blazers sa 1-4.