SLP bets kumolekta ng 9 ginto sa Thailand

BANGKOK, Thailand — Patuloy ang mainit na kampanya ng Swim League Philippines (SLP) matapos sumisid ng karagdagang siyam na ginto, apat na pi­lak at dalawang tansong me­dalya sa 2024 Asian Open School Invitational (AOSI) Aquatics Championships na ginaganap sa Assumption University Aquatic Center (ABAC) Suvarnabhumi Campus dito.

Nagpasiklab nang husto si Alarie Somuelo pa­ra angkinin ang tatlong gintong medalya sa girls’ 18-over class.

Naglagak si Somuelo ng dalawang minuto at 18.78 segundo para masik­wat ang ginto sa 200m freestyle event bago nama­yagpag sa 800m freestyle (10.45.22) at 1500m freestyle (20:33.72).

Hindi rin nagpahuli si ve­teran international campaigner Aishel Cid Evangelista na nanguna sa boys’ 12-13 200m breaststroke tangan ang bilis na 2:40.23.

Wagi rin ng gintong me­dalya sina Kevin Argu­zon, Antonio Joaquin Reyes, Kean Sebastian Paragatos, Sophia Rose Garra at Paulene Beatrice Obebe sa kani-kanilang mga pa­bo­ritong events.

Pinagharian ni Arguzon ang boys’ 16-17 100m butterfly bitbit ang 59.14 se­gundo, habang nangi­babaw si Reyes sa boys’ 14-15 100m butterfly sa oras na 1:00.51.

Nanguna naman si Pa­ragatos sa boys’ 12-13 50m backstroke (30.95), sa­mantalang nagningning si Garra sa girls’ 10-11 50m breaststroke (39.15) at na­naig si Obebe sa girls’ 14-15 50m freestyle (28.53).

Nakasiguro rin ang SLP ng pilak mula kina Zachary Joseph Tovera boys’ 12-13 50m backstroke (31.52), Ignacio Javier Avellanosa boys’ 6-under 50m backstroke (47.87), Marc Justin Yu boys’ 16-17 800m freestyle (9:22.24) at Kenzie Bengson girls’ 800m 9-year freestyle (11:50.06).

Matapos umani ng da­lawang gintong medalya ay nagdagdag ng isa pang tanso si Immaculate Heart of Mary College-Paranaque standout Mikhael Jasper Mojdeh sa boys’ 8-year 100m butterfly (1:39.42).

Naglista rin ng tansong medalya si Behrouz Mohammad Mojdeh sa boys’ 12-13 200m breaststroke (2:46.98).