Lakers pinaulanan ng tres ang Bulls
LOS ANGELES - Nagsalpak si D’Angelo Russell ng walong three-pointers para tumapos na may 29 points sa 141-132 pagpapabagsak ng Lakers sa Chicago Bulls.
Kumolekta si LeBron James ng 25 points at 12 assists ilang oras matapos isama sa kanyang record na ika-20 NBA All-Star team.
Si James ang unang 20-time All-Star sa NBA history para ungusan ang dating record ni Kareem Abdul-Jabbar.
Nauna nang nilampasan ni James si Abdul-Jabbar bilang leading scorer sa league history noong nakaraang season.
“Guys are feeling very comfortable out there. We’ve got guys that can make shots. We’ve got guys that can make plays. Doesn’t matter who’s shooting,” ani James.
Nagdagdag si Anthony Davis ng 22 points kasunod ang 20 markers ni Austin Reaves para sa Lakers (23-23), habang tumipa si Jarred Vanderbilt ng season-high 17 points.
Pinamunuan ni DeMar DeRozan ang Bulls (21-25) sa kanyang 32 points, habang may 25, 20 at 17 markers sina Coby White, Nikola Vucevic at Alex Caruso, ayon sa pagkakasunod.
Kinuha ng Lakers ang 73-57 halftime lead tampok ang 42-point second quarter kung saan sila kumonekta ng 15-of-18 field goal shooting.
Sa San Francisco, isinalpak ni Domantas Sabonis ang isang go-ahead dunk sa huling 22 segundo, habang kumana si Harrison Barnes ng career-high 39 points sa 134-133 paglusot ng Sacramento Kings (25-18) sa Golden State Warriors (19-23).
Sa Miami, humataw si Jayson Tatum ng 26 points at may 19 markers si Kristaps Porzingis sa 143-110 paglamog ng Boston Celtics (35-10) sa Heat (24-21).
Sa New York, nagkadena si Karl-Anthony Towns ng 27 points kasunod ang 24 markers ni Anthony Edwards sa 96-94 pag-eskapo ng Western Conference-leading Minnesota Timberwolves (32-13) sa Brooklyn Nets (17-27).
Sa New York, kumana si OG Anunoby ng 26 points at may 21 markers si Jalen Brunson sa 122-84 pagdaig ng Knicks (28-17) sa nagdedepensangDenver Nuggets (31-15).
Sa Indianapolis, kumolekta si Pascal Siakam ng triple-double na 26 points, 13 rebounds at 10 assists para sa 134-122 paggupo ng Indiana Pacers (25-20) sa Philadelphia 76ers (29-14).
- Latest
