Strong Group dismayado kay Mikey Williams

MANILA, Philippines — Dismayado ang pamunuan ng Strong Group sa hindi pagsipot ni Mikey Williams sa ensayo ng tropa na naghahanda para sa 2024 Dubai International Basketball Championships.

Mismong si Strong Group Athletics team owner Jacob Lao ang nagpahayag ng pagkakadismaya nito matapos mag-backout si Williams.

“We really don’t know what happened. Everything was in place, and we agreed to almost everything he wanted,” ani Lao sa official statement ng Strong Group.

Maayos ang usapan ng Strong Group at kampo ni Williams. Sinabi ni Lao na sinunod ng Strong Group ang lahat ng kahilingan ng Talk ’N Text player maging ang hinihiling nitong talent fee.

Ngunit nagulat na lamang ang Strong Group na hindi ito sumipot sa napagkasunduang pagdating nito.

“At first, he agreed to the price. Then he asked for a specific time frame for his arrival. However, he just didn’t show up at our practice when everybody was expecting him to, including former NBA stars and starters,” ani Lao.

Kaya naman wala nang magawa ang pamunuan ng Strong Group kundi ang mag-moveon at lumaro sa liga nang wala si Williams.

Mangunguna sa kampanya ng Strong Group si dating NBA star Dwight Howard ng LA Lakers kasama sina dating naturalized player Andray Blatche, former Oklahoma City Thunder defensive player Andre Roberson at McKenzie Moore.

 May problema rin si Williams sa pamunuan ng mother team nitong TNT Tropang Giga sa PBA.