Quizon nagsolo sa National Open
MANILA, Philippines — Nahawakan ni International Masters (IM) Daniel Quizon ang solong liderato matapos kalusin si Grand Master (GM) Darwin Laylo sa fourth round ng Philippine National Open Championships ‘Battle of the Grand Masters’ sa Marikina Community Convention Center.
Nakalikom ang pambato ng Dasmarinas, Cavite na si Quizon ng 4.0 points sa event na may 14-player single round robin, habang mag-isa sa second place si IM Jan Emmanuel Garcia.
Nakipag-draw si Garcia kay IM Barlo Nadera.
Lumalakas ang tsansa ni Quizon na masungkit ang P120,000 premyo sa tournament na inisponsoran ng Marikina City, nina NCFP chairman president Prospero Pichay, Jr., POC president Abraham Tolentino, PSC chair Richard Bachmann kasama ang Eugene Torre Chess Foundation at ang Pande at Amerikana ni Jundio Salvador.
Makakalaban ni Quizon sa round 5 si FM Mark Jay Bacojo at katapat ni Garcia si WGM Janelle Mae Frayna.
Magkasosyo sa No. 3 sina Bacojo, Frayna, FM Christain Gian Karlo Arca at GM John Paul Gomez na may tig-2.5 points.
Hahamigin ng mananalo ang P120,000, habang P70,000 at P50,000 ang second at third plcares, ayon sa pagkakasunod.
Ang top three finishers ang magiging pambato ng Pilipinas sa 45th World Chess sa Budapest sa 2024.
- Latest
