Bakbakang umaatikabo

Tapales vs Inoue para sa 4 korona

MANILA, Philippines — Matapos ang anim na taon ay magbabalik si Pinoy world super bantamweight champion Marlon Tapales sa Japan.

Kung noong 2017 ay na­pilitan siyang bakantehin ang suot na World Bo­xing Organization (WBO) bantamweight belt, ngayon ay dalawang korona ang tar­get ni Tapales na maisuot pag-uwi ng Pilipinas.

Sasagupain ni Tapales (37-3-0, 19 KOs) si Japanese super bantamweight title-holder Naoya Inoue (25-0-0, 22 KOs) sa ka­nilang unifica­tion championship fight nga­­yong alas-7 ng gabi sa Ariake Arena sa Tokyo, Japan.

Walang naging problema si Japanese titlist Noaya Inoue sa kanyang timbang. - Wendell Alinea

Sa kanyang huling pagbisita sa Japan noong Abril ng 2017 ay napuwersa si Ta­pales na bitawan ang ha­wak na WBO bantamweight crown dahil sa pagi­ging overweight.

Sa kabila nito ay tinalo pa rin ng Pinoy fighter si Ja­panese Shohei Omori via eleventh-round knockout sa Osaka.

Itataya ni Tapales ang mga bitbit na World Bo­xing Associaton (WBA) at In­ternational Boxing Fede­ration (IBF) belts, habang isu­sugal ni Inoue ang mga hawak na WBO at World Boxing Council (WBC) titles.

Pasado si Tapales sa official weigh-in sa kanyang bigat na 121 1/4 pounds, ha­bang nasukatan si Ino­ue ng 121 3/4 pounds pa­sok sa weight limit na 122 pounds.

Bagama’t may nakala­gay na ‘no rematch clause’ sa kanilang fight contract ay payag si Tapales na muling labanan si Inoue sakaling siya ang manalo.