Dyip yupi sa Fuel Masters

MANILA, Philippines — Nang kumawala ang Phoenix sa second period ay hindi na nakahabol ang Terrafirma.

Sinolo ng Fuel Masters ang second spot matapos pabagsakin ang Dyip, 103-84, para sa ikatlong sunod na ratsada sa Season 48 PBA Commissioner’s Cup kahapon sa Smart Araneta Coliseum.

Humakot si import Johnathan Williams ng 29 points, 13 rebounds at 4 assists para sa 4-1 record ng Phoenix at inihulog ang Terrafirma sa ikalawang dikit na kabiguan para sa 2-3 marka.

“We’re just playing r­eally good and unselfish basketball. and one the reasons is Johnathan (Williams) r­eally playing well,” ani coach Jamike Jarin. “It’s a collective effort offensively and defensively.”

Mula sa 23-19 abante sa first period ay humarurot ang Fuel Masters sa second quarter para itayo ang 43-21 bentahe mula sa triple ni Raffy Verano sa 5:02 minuto nito.

Tuluyan nang nabaon ang Dyip sa 91-61 sa 7:27 minuto ng final canto matapos ang salaksak ni RR Garcia.

Samantala, sinibak ng NLEX si import Thomas Robinson matapos ang komprontasyon nila ni NorthPort team manager Pido Jarencio noong Nob­yembre 22.

Ipinalit ng Road Warriors sa dating NBA player si 6-foot-9 Stokley Chaffee na kaagad sasalang laban sa Magnolia Hotshots bukas sa Philsports Arena.