MANILA, Philippines — Tumibay ang kapit ng University of the Philippines sa tuktok ng team standings matapos nilang payukuin ang University of the East, 79-72 sa UAAP Season 86 men’s basketball tournament na nilaro sa Araneta Coliseum, kahapon.
Lumiyab ang opensa ni Malick Diouf matapos irehistro ang double-double performance na 19 points at 15 rebounds para tulungan ang Fighting Maroons na ilista ang 9-2 karta at manatiling nasa No. 1 spot.
Dahil sa panalo, nakasisiguro na ang Diliman-based squad ng puwesto sa semifinals.
Lamang ang Fighting Maroons ng 13 puntos, 58-45 sa third period pero nagpakita ng angas ang Red Warriors at naibaba sa lima ang kanilang hinahabol, 60-55 papasok ng fourth quarter.
Kahit agresibo ang nilaro ng Red Warriors sa payoff period ay nanatili pa rin ang tikas ng Fighting Maroons, bentahe pa rin sila, 61-69 mula sa easy two points ni Diouf may limang minuto na lang sa laro.
Bumakas si CJ Cansino ng 17 markers habang siyam ang inambag ni veteran guard JD Cagulangan para sa Fighting Maroons. .
Nalasap naman ng Red Warriors ang pang-pitong kabiguan sa 11 laro, pero may pag-asa pa rin na makapasok sa final four.
Samantala, nagwagi sa unang laro ang defending champion Ateneo sa University of Sto. Tomas, 67-59.
Tumipa si Kai Ballungay ng 15 points at 14 rebounds para sa Blue Eagles na napaganda ang kanilang karta sa 5-6 at napalakas ang tsansa sa asam na final four.