PLDT diretso sa 2nd win
MANILA, Philippines — Ipinoste ng PLDT Home Fibr ang kanilang ikalawang dikit na panalo matapos talunin ang Farm Fresh, 25-17, 25-17, 25-20, sa Premier Volleyball League Second All-Filipino Conference kahapon sa Ynares Center sa Antipolo City.
Umiskor si Fil-Canadian Savannah Davison ng 18 points mula sa 13 hits, 3 aces at 2 blocks habang nagdagdag si Honey Rose Tubino ng 12 markers para sa 2-1 baraha ng High Speed Hitters.
“How did we get the win, nag-perform naman ng maayos, so happy kami,” ani head coach Rald Ricafort sa kanyang tropa.
Pinamunuan ni Kate Santiago ang Foxies, nahulog sa 0-3 marka, sa kanyang 11 points habang may 10 markers si Trisha Tubu.
Nagmula ang PLDT sa 25-16, 25-16, 25-23 panalo sa Akari bago isinunod ang Farm Fresh.
Sa unang laro, umiskor ang F2 Logistics ng 25-20, 25-14, 25-16 panalo sa baguhang Nxled para sa magkatulad nilang 1-1 kartada.
Nagposte si Ivy Lacsina ng 19 points mula sa 15 attacks at 4 blocks para sa unang panalo ng Cargo Movers na diniskaril ang hangad na back-to-back wins ng Chameleons.
“Mas nagkaroon kami ng communication ngayon kasi doon kami nagkulang last game versus Akari and ‘yung trabaho namin hindi na kami masyadong nag-stop ngayon,” pahayag ni Lacsina.
- Latest
