Gilas kailangan ng bagong lider, coach na may internasyonal na karanasan

MANILA, Philippines — Nangangailangan ang Gilas Pilipinas ng mga bagong lider at mga coach na may internasyonal na karanasan upang magwagi na sa mga susunod na pagsabak sa mga kumpetisyon matapos ang sunud-sunod na pagkatalo sa FIBA World Cup 2023.

Ito ang binigyang diin ni 3rd District Manila Rep. Joel Chua, isang abogado at sports advocate na nanghihinayang sa husay ng mga players ng Gilas Pilipinas pero sa kabila nito ay natalo dahil sa mahinang taktika sa pag-coach sa game.

Sa kabila nito, sinabi ni Chua na nagpapasalamat siya at nagpupugay sa buong koponan ng Gilas Pilipinas. Ang Gilas Pilipinas ay natalo sa kanilang laban sa Angola, Dominican Republic, Italy at South Sudan.

Ayon kay Chua, wala pa ring panalo ang Gilas sa FIBA World Cup habang ang Japan ay pangalawa na at sa pagkakataong ito ay sasabak naman ang mga ito laban sa Venezuela. Dahil sa pagkatalo ng Gilas ay posibleng masungkit ng Japan ang Paris 2024 slot para sa Asya.

“AJ Edu, Dwight Ramos, and Jordan Clarkson have been consistently better players. They deserve the accolades, really. Edu and Ramos, especially because they have shown the world, including the NBA and the leagues in Europe and Asia, what they can do”, ani Chua na sinabing sayang naman ang talent ng nasabing mga basketball players ng Gilas.

Sinabi ni Chua na ang head coach ng Gilas Pilipinas bago ang laban ay nagsabi pang ang ticket sa Olympics ang kanilang hangad sa umpisa pa lamang pero nabigo ang koponan na sunud-sunod ang pagkatalo na labis na ikinadismaya ng mga Pinoy fans.