EABL Philippines Youth League Invitationals sa September 2
MANILA, Philippines — Ilulunsad ng East Asia Basketball League (EABL) ang Philippine Youth Basketball League 23-and-Under Open Invitational Conference sa Setyembre 2 sa covered court ng Brgy. Jesus Dela Pena Gym sa Marikina City.
Ang bagong liga ay isang Inter-town at school-based na inorganisa ng EABL sa pamumuno nina Founder at Sports CEO Dr. Norman Afable at Batang Maynila chairman Dr. Joseph Ross Jocson.
“May mga kaibigan tayo sa iba’t ibang bansa na nagpahayag ng kanilang hangarin na makasali sa liga, gayundin ang makahanap ng mga players na puwedeng maglaro sa kanilang mga liga,” wika ni Afable.
Kasama nila sa Executive Committee sina US-based coach Ricky Magallanes, FIBA international referee Roger Basillio bilang league Commissioner, FIBA referee at Commissioner Reynaldi Manalac, Thailand-based coach at Commissioner Jojo Castillo, AFP Philippines coach at Commissioner Sonny Manucat, FIBA International Head Technical at Commissioner Lito Macaspac at Bishop Ceasar Pacis, ang Missionary Pastor at Spiritual Leader.
Layunin ng liga na makadiskubre at mahubog ang talento ng mga kabataan, lalo na ang out-of-school youth upang mabigyan ng pagkakataong makabangon sa buhay at maitaas ang antas ng kaalaman at kasanayan sa basketball.
Kabilang sa mga lalahok sa EABL ay ang Taytay Smile City, SMASH Navotas, Sta. Rosa Asiatech Jaguars, Makati Selection, RPBY East Dental Clinic Marikina, Fantastic San Pablo City at Mapua Cardinals.
Bukod sa karangalan bilang unang kampeon ng liga ay paglalabanan din ang premyong P50,000 para sa grand champion at tropeo at medalya para sa second at third placers.
- Latest