TNT binalikan ang Ginebra

MANILA,Philippines - Ilang beses nagtangkang bumangon ang nagdedepensang Barangay Ginebra mula sa double-digit deficit, ngunit hindi ito pinayagang mangyari ng TNT Tropang Giga.

Humakot si import Rondae Hollis-Jefferson ng 23 points, 19 rebounds at 9 assists para akayin ang Tropang Giga sa 95-82 pagganti sa Gin Kings sa Game Two ng 2023 PBA Governors Cup title series kahapon sa Smart Araneta Coliseum.

Bumangon ang TNT mula sa 90-102 pagkatalo sa Ginebra sa Game One noong Linggo para itabla sa 1-1 ang kanilang best-of-seven titular showdown.

“We refused to lose tonight. They know that we cannot go into this game behind 0-2,” sabi ni interim coach Jojo Lastimosa. “They know that this is a must win for us.”

Nag-ambag si Mikey Williams ng 21 markers kasama ang lima sa kabuuang 15 three-point shots ng Tropang Giga.

Nalimitahan si import Justin Brownlee sa 12 points mula sa masamang 3-of-16 field goal shooting para sa Gin Kings na nakahugot kay Christian Standhardinger ng 29 markers at 11 boards.

Nagdagdag si Jamie Malonzo ng 17 points, samantalang may 16 mar­kers, 10 boards at 5 assists si Scottie Thompson.

Itinayo ng TNT ang 16-point lead, 41-25, mula sa drive ni Williams sa 6:29 minuto ng second period bago nakalapit ang Ginebra sa 78-82 matapos ang free throw ni Standhardin­ger sa huling 6:18 minuto.

Nagsalpak si Williams ng dalawang tres at may isa si Pogoy para muling ilayo ang Tropang Giga sa 93-80 habang ang slam dunk ni Hollis-Jefferson ang tuluyan nang sumelyo sa kanilang panalo sa huling 1:12 minuto.