MANILA, Philippines — Unang makikilatis ang Gilas Pilipinas men’s 3x3 team ngayon bago ang women’s squad bukas sa pag-arangkada ng 2023 FIBA 3x3 Asia Cup main draw sa Singapore.
Haharang sa daan ng No. 4 Gilas men ang winner ng Qualifying Draw D sa alas-3:15 ng hapon bago sagupain ang Qatar sa alas-8:15 ng gabi sa Pool D main draw action.
Hindi pa alam sa idinaraos na qualifiers tampok ang Malaysia, Iran, Hong Kong at Brunei kung sino ang kukumpleto sa Pool D.
Bukas naman sasalang ang No. 10 Gilas women kontra sa No. 1 na China sa alas-2:50 ng hapon at laban sa No. 8 Iran sa alas-6:15 ng gabi sa Pool A main tournament ng women’s division.
Hangad ng Gilas men na maulit o kaya ay lagpasan ang semifinal finish noong nakaraang edisyon habang misyon ng Gilas women na makarating sa playoffs matapos masibak sa qualifiers.
Kailangan ng Gilas teams na makakuha ng Top Two finish sa kanilang mga grupo para makaabante sa knockout quarterfinals.
Tatrangko sa Gilas men sina PBA 3x3 scoring champion Almond Vosotros at Samboy de Leon ng grand slam champion na TNT Tropang Giga kasama sina Jorey Napoles ng Cavitex at Brandon Bates ng Platinum Karaoke.
Sa Gilas women ay babandera sina Afril Bernardino, Janine Pontejos, Khate Castillo at Clare Castro.