Valdez namasyal sa New York
MANILA, Philippines — Matapos ang pukpukang kampanya sa taong ito, pagkakataon naman ni Creamline team captain Alyssa Valdez na makapagpahinga at makapagbakasyon.
Sinamantala ni Valdez ang off season para makagala.
Nagtungo si Valdez sa New York City kasama ang teammates nitong sina Michele Gumabao at Ella De Jesus.
“Grateful to have seen this during our flight for a quick break. A reminder that pain is real but so is hope,” ani Valdez sa kanyang post sa Instagram.
May ilang post din si Valdez na kasama nito ang iba pang volleyball players gaya nina Sasa Devanadera, Angela Benting at Amanda Villanueva.
Bumisita sina Valdez, De Jesus at Gumabao sa pamosong Times Square sa New York at sa Metropolitan Museum of Art suot ang kanilang winter clothes lalo pa’t malamig na ngayon sa Amerika.
Magandang pagkakataon ito para makarekober.
Matatandaang nagtamo ng injury si Valdez sa Game 2 ng battle-for-bronze match ng Creamline kontra sa Chery Tiggo sa Premier Volleyball League (PVL) Reinforced Conference.
Matapos ang MRI, masayang ibinalita ng pamunuan ng Creamline na walang dapat ipangamba sa injury ni Valdez dahil hindi na ito mangangailangan pa ng operasyon.
Sa taong ito, dalawang korona ang nasungkit ng Cool Smashers — ang Open Conference at Invitational Conference.
- Latest
