F4 race sa PVL dikdikan

MANILA, Philippines — Mas magiging matindi ang bakbakan para sa nalalabing silya sa semifinals ng PVL Reinforced Conference.

Kaya naman apat na koponan ang mag-uunahang makuha ang krusyal na panalo sa mu­ling pagbisita ng liga sa Sta. Rosa Sports Complex sa Laguna ngayong araw.

Magtutuos ang Cignal at Choco Mucho sa alas-2:30 ng hapon habang lalarga ang paluan ng reigning Reinforced Conference champion Petro Gazz at F2 Logistics sa alas-5:30 ng hapon.

May tatlong puwesto na lamang ang natitira sa semis matapos kubrahin ng Chery Tiggo ang unang tiket bunsod ng kanilang imakuladang 5-0 marka.

Hawak ang 4-0 marka, isang panalo na lamang ang kailangan ng Creamline para masiguro ang ikalawang silya sa Final Four.

Kaya naman pukpukan ang magiging labanan para sa mga nalalabing tiket sa semis.

Nasa No. 3 ang Gazz Angels tangan ang 2-1 marka kasunod ang Cargo Movers at Flying Titans na parehong may 2-2 kartada habang nasa ibaba ang HD Spikers na may 1-2 rekord.

Inaabangan ang pagtutuos ng Petro Gazz at F2 Logistics na parehong galing sa panalo.

Mabilis na pinataob ng Gazz Angels ang Akari Chargers sa pamamagitan ng 25-13, 25-14, 25-20 demolisyon noong Sabado sa Sta. Rosa.

Pumutok sa naturang laro si import Lindsey Vander Weide na humataw ng 21 puntos.