Curry dinala ang Warriors sa panalo
SAN FRANCISCO — Iniskor ni Stephen Curry ang 28 sa kanyang 33 points sa isang 89-point first half para giyahan ang nagdedepensang Golden State Warriors sa 130-125 pagdaig sa bisitang Sacramento Kings.
Ito ang ikatlong sunod na 30-point performance ni Curry sa pagsisimula ng season para sa 2-1 record ng Warriors.
Kumamada si Curry ng 21 points sa second quarter tampok ang limang 3-pointers patungo sa 89-71 halftime lead ng Golden State sa Sacrameto (0-3).
“It was fun, 89 points in the first half, that’s crazy,” sabi ni Jordan Poole na tumipa ng 24 points kagaya ni Andrew Wiggins sa nasabing panalo ng Warriors.
Nakabangon naman ang Kings mula sa 26-point deficit para makadikit sa apat mula sa dunk ni Chimezie Metu sa huling 1:04 minuto ng fourth period.
Umiskor si De’Aaron Fox ng 26 points para sa Sacramento at nagdagdag si Domantas Sabonis ng 19 points at 14 rebounds.
Sa Los Angeles, nagpasabog si Devin Booker ng 35 points para ihatid ang Phoenix Suns sa 112-95 pagpulutan sa Clippers.
Itinala ni Chris Paul ng Suns ang kanyang pang-11,000 assists para samahan sina NBA legend John Stockton at Dallas Mavericks’ coach Jason Kidd bilang mga tanging players sa NBA history na nagtala ng ganoon karaming assists.
Si Paul rin ang unang player sa liga na naglista ng 20,000 points at 11,000 assists.
Sa Cleveland, kumamada si Donovan Mitchell ng 37 points sa pag-akay sa Cavaliers sa 117-107 overtime victory sa Washington Wizards.
Sa Los Angeles, nagposte si Damian Lillard ng 41 points at isinalpak ni Jerami Grant ang game-winning basket sa huling tatlong segundo sa 106-104 panalo ng Portland Trail Blazers sa Lakers.
Sa Oklahoma City, kumabig si Anthony Edwards ng 30 points sa 116-106 paglapa ng Minnesota Timberwolves sa Thunder.
Sa New Orleans, naglista si Lauri Markkanen ng 31 points sa 122-121 overtime win ng Utah Jazz sa Pelicans.
- Latest