MANILA, Philippines — Hangad ng TNT Tropang Giga na patuloy na solohin ang third spot sa pagharap sa NLEX sa 2022 PBA Commissioner’s Cup.
Lalabanan ng Tropang Giga ang Road Warriors ngayong alas-5:45 ng hapon matapos ang bakbakan ng Phoenix Fuel masters at Meralco Bolts sa alas-3 ng hapon sa Philsports Arena sa Pasig City.
Nagmula ang TNT (2-1) sa 110-91 panalo sa Rain or Shine (2-3) tampok ang hinataw na 41 points ni import Cameron Oliver.
Matapos naman ang 2-0 panimula sa torneo ay nahulog ang NLEX (2-2) sa dalawang dikit na kamalasan sa Phoenix, 97-111, at sa Magnolia, 97-111, nang hawakan ni coach Frankie Lim ang koponan.
Bagama’t hindi naglaro si import Steve Taylor, Jr. para sa Elasto Painters ay nahirapan pa rin silang iligpit ng Tropang Giga.
“We need to play a full 48 minutes and we’re not there yet,” galit na wika ni TNT coach Chot Reyes.
Sa ikalawang laro, target naman ng Fuel Masters ang kanilang ikatlong sunod na ratsada sa pagharap sa Bolts.
Nagmula ang Phoenix sa 0-3 panimula bago humataw ng dalawang sunod na panalo.
Samantala, ipaparada ng San Miguel si import Devon Scott.