Grand homecoming karon
CEBU, Philippines — Mihatag sila og garbo ug dungog sa nasud sa natad sa paugnat kusog.
Karon panahon na nga ibalik kanila ang pasidungog.
Ang mga Sugbuanong atleta nga nakadaog og medalya sa 31st Southeast Asian (SEA) Games didto sa Vietnam ning bag-ohay pa lamang maoy masentro sa atensiyon sa usa ka Grand Homecoming karong adlawa sa SM Seaside City.
Ang espesyal nga seremonyas nga gipasiugdahan sa kagamhanan sa dakbayan sa Sugbo ubos sa liderato nilang mayor Mike Rama ug vice mayor Dondon Hontiveros inabagan sa Cebu City Sports Commission nga ginagulohan ni John Pages magsugod sa alas-4 sa hapon.
Usa kini ka bulawanong oportunidad alang sa mga fans nga mahimamat ang ilang mga idolo ug makighugoy-hugoy sa mga bayaning atleta gikan sa Sugbu nga dako og natabang sa Team Philippines nga mitapos sa ikaupat nga puwesto sa prestihiyosong torneyo nga mahitabo kausa lamang sud sa duha ka tuig.
Ang rayna sa billiards nga si Rubilen Amit maoy nag-una sa listahan sa mga Sugbuanong medalists sa Hanoi SEA Games uban ang duha ka golds sa women's 9-ball ug 10-ball events.
Sila si Michael Angelo Marquez ug Stephanie Sabalo naka-gold sab human nanghawod sa chachacha sa dancesport competition. Nakakuha sab sila og duha ka silver sa jive ug the five-dance event.
Ang lain pang nakamedalya mao sila si Wilbert Aunzo ug Pearl Marie Caneda (silver ug duha ka bronze sa dancesport), Elreen Ann Ando (silver sa weightlifting), Andrew Kim Remolino (silver sa triathlon), Raven Faith Alcoseba (bronze sa triathlon), Sisi Rondina ug Dij Rodriguez (bronze sa women's beach volleyball), Alexis Sy (silver sa bowling), Lois Kaye Go (bronze sa golf), Richard Gonzales (silver sa table tennis), Rheyjey Ortouste (duha ka bronze sa sepak takraw), ug sila si June Mar Fajardo ug Roger Pogoy (silver sa basketball.
- Latest
