MANILA, Philippines — Nalusutan ng University of the Philippines ng matikas na kamada ng University of the East, 81-66, upang masungkit ang ikatlong panalo sa UAAP Season 84 men’s basketball tournament kahapon sa Mall of Asia Arena sa Pasay City.
Nanguna para sa Fighting Maroons si Zav Lucero sa itinalang 14 points tampok ang 8-of-9 clip sa free throw area, habang nagtala rin si Ricci RIvero ng 14 markers at 3 steals.
Nakalikom si CJ Cansino ng 10 points at nagdagdag si Malick Diouf ng 7 markers, 6 rebounds, 6 blocks at 3 assists para sa UP na umangat sa 3-1 rekord para sa No. 3 spot.
Nagawang palobohin ng Fighting Maroons ang kalamangan sa 30 points, 65-35, sa third quarter.
Subalit mainit ang Red Warriors sa pagsisimula ng huling kanto nang magpasabog ng 17-2 run sa likod ni Kyle Paranada para maibaba ito sa 11 points, 62-73.
Agad sumaklolo sina Diouf at Lucero para tuluyang pigilan ang paghahabol ng Red Warriors.
Umiskor si Clint Escamis ng 16 points at 6 steals para sa Red Warriors.
Wala pa ring panalo ang UE sa apat na pagsalang.
Sa unang laro, nanaig ang National University sa Far Eastern University, 73-68, para makuha ang ikalawang panalo sa apat na laro.
Laglag naman sa 1-3 ang marka ng Tamaraws.
Samantala, sinakmal ng University of Santo Tomas ang Adamson, 79-72, tungo sa 2-2 baraha.