MANILA, Philippines — Isang malungkot na balita ang bumungad sa volleyball community matapos magpositibo sa coronavirus disease (COVID-19) si volleyball star Alyssa Valdez.
Sariwa pa sa matagumpay na kampanya si Valdez sa katatapos na Celebrity Edition ng Pinoy Big Brother Kumunity Season 10.
Kalalabas lang nito ng Bahay ni Kuya noong Enero 2.
Ngunit kinumpirma kahapon ng V Management Group — ang management agency na siyang humahawak sa career ng Creamline Cool Smashers team captain na nagpositibo ito sa virus.
“After experiencing mild symptoms and a confirmatory RT-PCR test, Alyssa tested positive for Covid-19,” ayon sa inilabas na statement ng ahensiya.
Humingi ang ahensiya ng panalangin sa mabilisang paggaling ni Valdez kasabay ng pasasalamat sa mainit na mensaheng natatanggap nito.
“We’d like to thank those who have sent their well-wishes and prayers her way. Please be rest assured that Alyssa is taking the necessary precautions and will be recovering from home. We are one with the rest of the Filipinos in praying for everyone’s good health and safety,” ayon pa sa statement.
Maayos naman ang kalagayan ni Valdez.
Sa katunayan, matapos nitong lumabas sa Bahay ni Kuya, agad itong sumalang sa magagaan na ensayo via online kasama ang kanyang teammates sa Creamline.
Isa si Valdez sa Top 2 housemates sa katatapos na PBB Kumunity Season 10 Celebrity Edition kung saan tumanggap ito ng P100,000 premyo at makakasama sa Big Night ng reality show.
Nagpost din si Valdez sa kanyang Twitter account ng pasasalamat sa mga patuloy na nananalangin sa kanyang paggaling.
“Thank you all for the well-wishes,” ani Valdez.