Karate Pilipinas pormal na kikilalanin ng WKF

MANILA, Philippines — Ibibigay ng World Karate Federation (WKF) sa susunod na linggo ang basbas nito sa Karate Pilipinas para maging opisyal na governing body ng nasabing sport sa bansa.

Gagawin ito ng WKF sa isasagawang world karate congress sa Nobyembre 16 sa Dubai, United Arab Emirates, ayon kay Karate Pilipinas president Richard Lim.

Noong isang taon pa inasahan ni Lim na bibigyan sila ng rekognisyon ng karate federation kundi lamang sumambulat ang coronavirus disease (COVID-19) pandemic.

Nauna nang binigyan ng WKF ng provisional recognition ang Karate Pilipinas noong 2018 bilang kapalit ng Philippine Karate Federation (PKF).

Magtutungo si Lim sa world congress sa Dubai kasama sina national team coaches Okay Arpa at Chino Veguillas at Philippine Sports Commission (PSC) board member Ramon Fernandez na personal na inimbitahan ni WKFpresident Antonio Espinos.

Matapos ang pulong ay idaraos ang World Championships na nakatakda sa Nobyembre 18-21 kung saan sasabak sina Fil-Japanese at World No. 2 Junna Tsukii, 2019 Southeast Asian Games gold medalist Jamie Lim, Enrico Vasquez, Jr. at Sarah Pangilinan.