Saso No. 5 na sa world ranking

MANILA, Philippines — Hindi maawat si Tokyo Olympics veteran Yuka Saso sa pag-angat sa mundo ng golf nang umakyat ito sa career-best No. 5 spot sa world ranking.

Muling sumulong si Saso base sa bagong inilabas na listahan ng Women’s World Golf Rankings kahapon kung saan umakyat ng dalawang spots ang 20-anyos Pinay golfer mula sa kanyang dating ikapitong puwesto.

Malaki ang naitulong ng kanyang fourth-place finish sa katatapos na Cognizant Founders Cup noong Lunes.

Sa kabuuan, mayroon nang 222.37 puntos si Saso sa 39 events na nilaruan nito.

Pinakamalaking puntos na nakuha nito noong magkampeon sa prestihiyosong US Women’s Open noong Hunyo.

Malayo naman ang puwesto ng dalawa pang Pinay golfers na sina Bianca Pagdanganan at Dottie Ardina .

Pang-163 si Pagdanganan taglay ang 28.10 points na nakuha nito mula sa 25 events habang may 25.97 points si Ardina sa 54 events na nilaruan nito, sapat lamang sa ika-163 posisyon.

Napanatili naman ni American Nelly Korda ang unang puwesto sa world ranking habang magkakasunod sina South Koreans Ko Jin Young, Park In Bee at Kim Sei Young sa ikalawa hanggang ikaapat na puwesto.

Nakapaglaro na ang Tokyo Olympics gold medalist na si Korda sa 48 events para makalikom ng kabuuang 450.71 points.