Spence pagreretiruhin si Pacquiao

MANILA, Philippines — Desidido si Errol Spence Jr. na pagreretiruhin si Manny Pacquiao sa kanilang mega fight sa Agosto 21 (Agosto 22 sa Maynila sa T-Mobile Arena sa Las Vegas, Nevada.

Optimistiko ang reig­ning World Boxing Council (WBC) at International Boxing Federation (IBF) welterweight champion na makukuha nito ang panalo kontra sa Pinoy champion.

At sisiguraduhin ni Spence na sa oras na matapos ang laban, tiyak na magreretiro na si Pacquiao sa mundo ng boksing.

“I think he’ll definitely retire after this fight,” ani Spence sa panayam ng Showtime.

Malaki ang tiwala ni Spence na madedepensahan nito ang kanyang dalawang korona laban sa Pinoy pug.

Subalit hindi nito nilinaw ni Spence kung patutumbahin nito si Pacquiao via knockout.

Aminado si Pacquiao na ito ang pinakamalaking hamon sa kanyang boxing career.

Kaya naman puspusan ang training nito sa Wild Card Gym sa Hollywood, California dahil nais nitong maihanda ng lubos ang kanyang sarili.

At sa oras na lumabas ang bagsik ni Pacquiao, walang duda na mahihirapan ng husto si Spence bago maisakatuparan ang inaasam nitong pangarap na “retirement” para sa Pinoy champion.

Hindi pa man natatapos ang laban, may ibang plano na agad si Spence — ang makaharap si reigning World Boxing Organization (WBO) welterweight king Terence Crawford sa isang unification bout.