Inoue pababagsakin si Dasmarinas

MANILA, Philippines — Puntirya ni world champion Naoya Inoue na makuha ang knockout win laban kay Michael Dasmarinas sa kanilang bakbakan sa Hunyo 19 (Hunyo 20 sa Maynila) sa Las Vegas, Nevada.

Dedepensahan ni Inoue ang kanyang World Boxing Association (WBA) at International Boxing Federation (IBF) bantamweight belts.

At nais nitong magkaroon ng magandang resulta ang kanyang title defense kaya’t walang iba kundi knockout ang target nitong makuha.

“I want to show a different boxing than usual,” ani Inoue.

Inutusan ni promoter Hideyuki Ohashi si Inoue na pabagsakin si Dasmarinas para mabigyan ng magandang impresyon ang mga boxing fans sa Amerika.

Si Ohashi ang humahawak sa boxing career ni Inoue.

Alam naman ni Shingo Inoue - ang ama at trainer ni Naoya - na matikas din si Dasmarinas.

Nagtataglay ang Pinoy pug ng mabagsik na suntok at solidong depensa.

Subalit napag-aralan na ng Inoue camp ang bawat galaw ni Dasmarinas kaya’t alam na ng Japanese fighter ang gagawin sa oras na makasagupa ito.

Lamang si Dasmarinas sa height. Nasa 5-foot-7 ito kumpara sa 5-foot-5 na si Inoue.