Pacquiao bumubuo na ng game plan?

MANILA, Philippines — Bumubuo na ng game plan si eight-division world champion Manny Pacquiao para sa kanyang mga susunod na hakbang.

Makahulugang post ang inilabas nito sa kanyang Instagram account na may caption na “strategy, patience and discipline” na posibleng mga ginagawang game plan.

Walang linaw kung sa mundo ito ng boksing o sa mundo ng pulitika.

Wala pang inihahayag ang Pacquiao camp kung sino ang sunod na makakalaban nito.

Subalit una nang isiniwalat ni Pacquiao na nag-umpisa na ito sa kanyang training camp para sa kanyang next fight dahil matagal-tagal din itong hindi nasilayan sa aksyon sa actual fight.

Matatandaang noong 2019 pa huling lumaban si Pacquiao laban kay Keith Thurman kung saan naitala nito ang split decision win para makuha ang WBA welterweight belt.

Kalaunan, binawi ng WBA ang naturang korona matapos mabigo si Pacquiao na madepensahan ang titulo sa mahabang panahon dahil sa pandemya.

Kaya naman nakatutok na ang lahat sa pangalan ng kanyang susunod na makakaharap sa oras na magbalik-aksyon ito sa ibabaw ng ring matapos ang mahigit isang taong pagkakatengga.

Maraming pangalan ang nakalinya kabilang na sina Mikey Garcia, Ryan Garcia, Terence Crawford at Errol Spence kung saan pipili na lamang ito ng kanyang makakalaban.

Naniniwala si Mikey na may karapatan si Pacquiao na pumili ng makakalaban nito dahil itinuturing na itong isang living legend sa mundo ng boxing.

Gaya ng ibang boxers, walang magawa si Mikey kundi ang maghintay.