Kung sinu-sino na lang!
Ryan Garcia gusto ring labanan si Pacquiao
MANILA, Philippines — Sumama na rin si interim World Boxing Council (WBC) lightweight champion Ryan Garcia sa mahabang listahan na gustong labanan si eight-division world champion Manny Pacquiao.
Sariwa pa si Garcia sa matamis na seventh-round knockout win kay Luke Campbell ng Great Britain noong Enero 2 (Enero 3 sa Maynila) sa American Airlines Center sa Dallas Texas.
Nakuha nito ang bakanteng interim WBC belt.
Kaya naman malakas ang loob nitong hamunin si Pacquiao na itinuturing nitong idolo sa mundo ng boksing.
Nais ni Garcia na maging bahagi ng maningning na boxing career ng Pinoy champion bago ito magretiro.
Alam ni Garcia ang kalidad ng isang Manny Pacquiao kaya’t malaking karangalan kung mapagbibigyan itong makalaban ang isang legendary boxer sa ibabaw ng ring.
“My dream is, I beat Tank Davis and then I end up getting a chance to fight Manny Pacquiao before he gets to go because he’s one of my idols,” ani Garcia sa panayam ng Now Boxing.
Nasa lightweight division si Garcia habang nasa bantamweight class naman si Pacquiao.
Ngunit handa itong lumundag ng weight class upang maisakatuparan lamang ang kanyang pangarap na makalaban ang world class Pinoy boxer.
Subalit daraan sa butas ng karayom si Garcia bago makuha ang inaasam nitong laban dahil mahaba ang pila ng mga nais makasagupa si Pacquiao.
Nasa unahan ng listahan si Ultimate Fighting Championship superstar Conor McGregor na inaasahang makakalaban ni Pacquiao sa unang bahagi ng taon sa Middle East.
Nakalinya pa sina Terence Crawford, Errol Spence Jr., Danny Garcia at Mikey Garcia.
- Latest
