MANILA, Philippines — Bigo si Pinoy boxing sensation Reymond Yanong na masundan ang kanyang impresibong panalo dalawang linggo na ang nakalilipas matapos umani ng first-round knockout loss kay American fighter Genaro Gamez kahapon sa Las Vegas, Nevada.
Nagawang makorner ni Gamez si Yanong kung saan pinakawalan nito ang solidong suntok na tumama sa panga ng Pinoy champion.
Bagsak si Yanong na hindi na nakabalik pa sa porma matapos ang 10 segundong bilang ng referee dahilan upang tuluyang makuha ni Gamez ang panalo.
Laglag si Yanong sa 11-6-1 rekord habang umangat sa 10-1-0 si Gamez.
Si Yanong ang ikalawang Pinoy na natalo sa Las Vegas.
Una nang yumuko si Mark Bernaldez kay undefeated American fighter Albert Bell noong nakaraang linggo sa MGM Grand Conference Center.