Simula na ang giyera sa semis

Basilan vs Bacoor; Davao kontra Zamboanga

MANILA, Philippines — Haharapin ng top seed Davao Occidental ang No. 5 seed Zamboanga habang magtatagpo naman ang second seed Bacoor Strikers at third seed Basilan Steel ngayon sa Game 1 ng best-of-three semifinal series ng Southern Division sa 2019-2020 MPBL-Chooks-to-Go Lakan Cup sa Rizal Memorial College Gym sa Davao City.

Paborito ang Davao kontra sa Zamboanga sa kanilang laban sa alas-9 ng gabi bunga ng kanilang malawak na karanasan  kung saan winalis nila ang Bacoor, 2-0, sa semis ng nakaraang Datu Cup.

Magtatagisan naman ang Bacoor at Basilan sa alas-7 ng gabi.

Hawak ng Davao ang homecourt advantage bilang top seeded team sa South group kaya malaking bagay para sa Tigers na ipakita sa kanilang mga taga-suporta ang muling pag-akyat sa kampeonato.

Hindi pa tiyak kung maglalaro si Mark Yee dahil sa partial ACL tear sa kanang tuhod, ngunit inaasahan naman ni head coach Don Dulay na mag-step up ang kanyang mga bataan gaya nina Chester Saldua, Bonbon Custodio, Emman Calo, June Kenneth Mocon, Billy Robles at Jerwin Gaco.