MANILA, Philippines — Bagama’t nabigo sa nakaraang laro, pipiliting ng Letran Knights na makabangon agad sa pakikipaglaban sa Arellano Chiefs habang magtatagpo naman ang SSC-R Stags at JRU Heavy Bombers ngayon sa pagpapatuloy ng Season 95 NCAA basketball tournament sa The Arena sa San Juan City.
Magtatagpo ang Knights (9-6) at ang Chiefs (4-10) sa alas-2 ng hapon at susundan ng labanan ng San Sebastian Stags (7-6) at Jose Rizal Heavy Bombers (4-9) sa alas-4 ng hapon.
Makikipagtipan naman ang Letran Squires sa Arellano Braves sa alas-10 ng umaga at ang JRU Light Bombers kontra sa SSC-R Staglets sa alas-12 ng tanghali sa Juniors’ division.
Nabigo ang Knights sa three-peat champion San Beda, 63-75 noong Martes kaya kailangan nilang bumangon agad para kumapit sa ikatlong puwesto sa likuran ng Red Lions (15-0) at Lyceum Pirates (11-3).
Kung mabibigo ang Letran sa Arellano, babagsak sila sa pang-apat na puwesto sa 9-7 win-loss kartada habang aakyat naman ang Stags sa third spot sa 8-6 record kung magtagumpay ang tropa ni coach Egay Macaraya laban sa JRU sa ibang laro.
Bukod sa San Beda na nakakasiguro na sa top spot at unang twice-to-beat bentahe sa malinis na 15-0 card, mayroon na lamang natitirang mahigit tig-4 na laro ang bawat koponan sa second round elimination kaya bawat laro ng mga nasa top six kabilang na ang No. 5 Mapua (7-7) at No. 6 St. Benilde (6-7) ay krusyal.